Programe Shqip : blogu

E para i kushtohet sigurisë kibernetike dhe e gjeni këtu.

Etiketa: Avast, bashkësi, BitDefender, doracak, fjalëkalim, i parrezikuar, Internet, karremëzim, krimb, kuaj Troje, lidhje e sigurt, llogari e komprometuar, Long URL, malware, mesazh i padëshiruar, mirëfilltësim dyhapësh, Mozilla, ndihmëz, përditësim, përdorues, PIN, privatësi, programues, publik, rrjet, sajt, shfletim, shtojca, siguri kibernetike, sistem sigurie, syhapur, të dhëna personale, URL Tooltip, virus, Wi-Fi

Firefox Hello është një aplikacion i ri nga Mozilla, që ju jep mundësinë të bëni thirrje me video në internet edhe pa krijuar llogari diku, pra pa u dhënë hollësi mbi identitetin e personave të përfshirë në thirrje. I bazuar në teknologjinë WebRTC, Firefox Hello-ja përdor shfletuesin për të realizuar dhe zhvilluar thirrjen. Si i tillë do të funksionojë vetëm me shfletues që e mbulojnë WebRTC-në. Firefox-i, Google Chrome dhe Opera janë ata që e mbulojnë deri më sot.

Pra fare thjesht, nëse përdorni një prej shfletuesve të mësipërm, shkoni te faqja e Firefox Hello-së dhe provojeni.

Firefox Hello është tashmë i përkthyer në shqip.

Etiketa: aplikacion, Firefox Hello, Mozilla, shqip, teknologji, thirrje video, WebRTC

Firefox OS-i është një sistem i ri operativ për celular, i ndërtuar mbi JavaScript-in. Perspektivat e tij janë të shumta, duke qenë se ofron një alternativë të njëmendtë kundrejt platformash të tjera celulari, pronësore dhe kufizuese. Përfitimet e menjëhershme të prekshme do të ishin çmime më të lira për telefona të mençur. Përfitimet afatgjata lidhen me aspekte të konkurrencës ndaj platformave pronësore. Mozilla po përpiqet të bëjë me pajisjet celulare atë që bëri me Firefox-in vite më parë: të ofrojë alternativë të hapur dhe të suksesshme ndaj platformash pronësore.

Sistemi operativ i Mozilla-s për pajisje celulare, Firefox OS mund të përshtatet fare mirë për tablet. Te kjo galeri mund të shihni foto ekrani të bëra me Firefox OS-in në veprim, në shqip, në një tablet.

Veç gjërave të zakonshme që priten nga një sistem operativ për pajisje celulare dhe nga një përkthim në shqip, në disa prej fotove mund të shihet tastiera virtuale e shqipes. Çfarë e bën të dallueshme këtë tastierë është mungesa e dubëlvësë së panevojshme për shqipen, dhe prania e ë-së dhe ç-së, të dukshme dhe me pushtet të barabartë me shkronjat e tjera të alfabetit.

Kjo është një kopje tjetër nga ajo e depozituar në projekt. Përpjekjet qenë për një tastierë si kjo më sipër. Por, me numërim të thjeshtë “votash” u vendos, nga persona që nuk e njohin shqipen dhe nevojat e saj, dhe në analogji me zgjidhje të tjera të papjekura, për një version tjetër.

Nëse dikush e sheh të arsyeshme sendërtimin e një tastiere si më sipër, i lutem të komentojë te Bugzilla. Po të arrihet një numër më i madh se i kundërshtarëve, mund të kërkohet përmbysja e rezultatit.

Një tjetër hollësi është përdorimi për galerinë e fotove i Mediagoblin-it, paltformës së lirë, të decentralizuar, për publikim figurash, video apo audio.

Etiketa: celular, Firefox OS, flatfish, foto ekrani, platformë e decentralizuar, shqip, sistem operativ, tablet, tastierë, TCP Project

Një minisajt i Mozilla-s mbi privatësinë dhe mbrojtjen e saj.

Etiketa: DuckDuckGo, Firefox, Lightbeam, Mozilla, privatësi, TED

Marrë nga Mozilla.org

Etiketa: adresë IP, browser, Firefox, gjeolokalizimi, Google Geolocation Privacy Policy, Google Location Services, Mozilla, privatësi, shfletim i ndjeshëm ndaj vendit, shfletues, standarde të hapura, teknologji

Rrjeti i i Zhvilluesve Mozilla është një bashkësi e hapur programuesish që krijojnë burime për një web më të mirë, pavarësisht markave, shfletuesve ose platformave. Në të mund të kontribuojë kushdo që ndihmon të shtyhen përpara risitë në Web në shërbim të së mirës së përgjithshme. Dëshironi të mësoni si të ndërtoni një site-e Web? Dëshironi të mësoni përdorimin e teknologjive mbi të cilat xhiron Web-i? Te site-i i MDN-së do të gjeni të grumbulluar një koleksion të vlefshëm burimesh me të cilat mund të fillonit. Këto janë burime të krijuara nga kompani dhe programues web që mendojnë për të ardhmen, që kanë përqafuar standardet e hapura dhe praktikat më të mira të programimit web. Këto burime Mozilla dëshiron t’i ndajë me bashkësinë e vet ndërkombëtare.

Hidhini një sy Mozilla Demo Studios, ku zhvillues si ju mund të zhvillojnë, ndajnë me të tjerët, demonstrojnë dhe të mësojnë gjithçka rreth teknologjive Web. Eksplorojeni dhe shihni se ç’mund të arrihet duke përdorur HTML-në, CSS-në, dhe JavaScript-in. Shqyrtoni kodin burim të këtyre demove, që të shihni se si funksionojnë. Lexoni dokumentimin për to që të mësoni rreth standardeve të hapura dhe teknologjive që mbajnë në këmbë Web-in.

Ja pak shembuj të hijshëm:

Te site-i, nën ndarjen Demo, do të gjeni plot shembuj të tillë. Filloni krijoni një të tuajin dhe parashtrojeni në garat mujore Dev Derby.

Hyrje

Interneti po bëhet gjithnjë e më tepër pjesë e rëndësishme e jetës sonë.

Projekti Mozilla është një bashkësi mbarëbotërore njerëzish që besojnë se të qenët i hapur, risia, dhe dhënia e mundësive janë kyçet e shëndetit në vazhdimësi të Internetit. Punojmë së bashku që prej 1998, për të bërë të mundur që Interneti të zhvillohet i tillë që prej tij të përfitojnë të gjithë. Jemi më shumë të njohur për krijimin e shfletuesit Web Mozilla Firefox.

Për krijimin e programeve të cilësisë së parë dhe me burim të hapët, si dhe për zhvillimin e llojeve të reja të veprimtarive për bashkëpunim mes njerëzve, projekti Mozilla përdor metodën e punës në bashkësi. Krijojmë bashkësi personash të përfshirë në bërjen e Internetit më të mirë për të gjithë ne.

Si rrjedhojë e këtyre përpjekjeve, kemi përftuar një grup parimesh të cilat besojmë se janë kritike që Interneti të vazhdojë të sjellë përfitime si për të mirën e përbashkët, ashtu edhe për anën komerciale të jetës. Këto parime po i ravijëzojmë më poshtë.

Qëllimet e Manifestit janë:

1. t’i japë formë përfytyrimit që bashkëpunëtorët e Mozilla-s dëshirojnë të ndiqet nga Mozilla Foundation;
2. t’u flitet si atyre që kanë, ashtu edhe atyre që nuk kanë njohje teknike;
3. t’i bëjë pjesëmarrësit te Mozilla krenarë për çka bëjnë dhe t’i nxisë të vazhdojnë kështu; dhe
4. të furnizojë një kuadër për të tjerë persona që do të shtyjnë më para këtë përfytyrim të Internetit.

Këto parime nuk lulëzojnë vetë. Lypsen njerëz që ta bëjnë Internetin të hapur dhe dashamirës – njerëz që punojnë më vete, që punojnë tok në grupe, dhe që udhëheqin të tjerët. Mozilla Foundation i është përkushtuar shpënies më tej të parimeve të ravijëzuara te Manifesti Mozilla. Ftojmë edhe të tjerët të bashkohen me ne për ta bërë Internetin një vend akoma më të mirë për të tërë.

Parimet

1. Interneti është pjesë e pandarë e jetës moderne–përbërës kyç në edukim, komunikim, bashkëpunim, biznes, dëfrim dhe në shoqërinë në tërësi.
2. Interneti është burim i përbashkët mbarëbotëror dhe duhet të mbesë i hapur dhe i shfrytëzueshëm.
3. Interneti duhet të pasurojë jetën e qenieve njerëzore.
4. Siguria e individit në Internet është themelore dhe nuk mund të trajtohet si opsionale.
5. Individit duhet t’i jepet mundësia të ngjizë vetë përvojën e tij në Internet.
6. Efektshmëria e Internetit si burim i përbashkët varet nga ndërveprimi (protokolle, formate të dhënash, përmbajtje), risia dhe pjesëmarrja e decentralizuar anembanë botës.
7. Programet e lira dhe me burim të hapët nxisin zhvillimin e Internetit si burim i përbashkët.
8. Punimi me bazë bashkësinë, dhe i tejdukshëm, nxit pjesëmarrjen, përgjegjshmërinë dhe besimin.
9. Ndërhyrjet komerciale në zhvillimin e Internetit sjellin mjaft përfitime; një drejtpeshim midis synimeve komerciale dhe të mirës së përbashkët është kritik.
10. Rritja e anëve të Internetit që lidhen me përfitimin e përbashkët është qëllim me rëndësi, për të ia vlen të harxhohet kohë, kujdes dhe përkushtim.

Shpënia më tej e Manifestit Mozilla

Ka plot rrugë të ndryshme për të shpënë më tej parimet e Manifestit Mozilla. Ne i shohim me sy të mirë një gamë të gjerë veprimtarish, dhe parashikojmë të njëjtën shkallë krijimtarie që bashkëpunëtorët e Mozilla-s kanë treguar edhe në fusha të tjera të projektit. Për persona të papërfshirë thellë në projektin Mozilla, një rrugë themelore dhe tepër e efektshme për të mbështetur Manifestin është të përdoren Mozilla Firefox-i dhe të tjerë produkte në të cilat mishërohen parimet e Manifestit.

Zotimi i Mozilla Foundation-it

Mozilla Foundation zotohet të mbështesë Manifestin e Mozilla-s përgjatë veprimtarive të tij. Në veçanti:

• do të ndërtojë dhe bëjë të mundura teknologji me burim të hapur dhe bashkësi që mbështesin parimet e Manifestit;
• do të krijojë dhe shpërndajë produkte të fuqishëm konsumatori, që mbështesin parimet e Manifestit;
• do të përdorë burimet e Mozilla-s (pronësinë intelektuale, të tilla si të drejtat e autorit dhe shenjat tregtare, infrastrukturën, fondet dhe famën) për ta mbajtur Internetin platformë të hapur;
• do të nxisë modele krijimi vlerash ekonomike për të mirën publike;
  dhe
• do të nxisë përhapjen e parimeve të Manifestit Mozilla në diskursin publik dhe brenda vetë industrisë së Internetit.

Disa veprimtari të Mozilla Foundation-it–hëpërhë krijimi, qarkullimi dhe përhapja e produkteve të konsumatorit–drejtohen së pari nga nëndegë në pronësi të plotë të Mozilla Foundation-it, Mozilla Corporation.

Ftesë

Mozilla Foundation fton gjithë të tjerët që mbështesin parimet e Manifestit Mozilla të bashkohen me ne, dhe të gjejmë rrugë të reja për ta bërë realitet këtë përfytyrim të Internetit.

Etiketa: bashkëpunim, bashkësi, besim, biznes, burim i hapët, burim i përbashkët, dëfrim, diskursi publik, e mira publike, edukim, Firefox, formate të dhënash, infrastrukturë, Internet i hapur, Interneti, komunikim, Mozilla Corporation, Mozilla Foundation, përgjegjshmëri, pjesëmarrje e decentralizuar, platformë e hapur, programet e lira dhe me burim të hapët, projekti Mozilla, pronësi intelektuale, protokolle, risi, shenja tregtare, siguria e individit, të drejta autori, të qenët i hapur, teknologji me burim të hapur

Mozilla Foundation sapo ka publikuar në rrjet raportin e saj vjetor mbi Gjendjen e Mozilla-s për vitin 2011.

Sipas Mitchell Baker-it, raporti “jep hollësi për synimet dhe nismat tona në të ardhmen, ndikimin tonë gjatë vitit të kaluar, veprimtaritë e Mozilla-s dhe të dhënat financiare të saj për 2011.”

Në Shqip materialin e gjeni këtu.

Moxillianë është një projekt anësor i Mozilla-s që synon krijimin e një liste, një burimi të dhënash, rreth personave që merren në nivele të ndryshme me veprimtari në kuadrin e projektit, cilët janë, çfarë bëjnë dhe se si mund të lidhet dikush me ta, që kështu bashkëpunimi të ishte më i lehtë.

Për më tepër, vizitoni site-in e projektit.

Etiketa: aktivizëm, bashkësi, Internet, moxillian, Mozilla, online, projekt

Përhapës i Firefox-it – një mini-projekt i Mozilla-s që do t’u lejojë gjithë dashamirësve të Firefox-it të shpalosin përkrahjen e tyre dhe ta shtrijnë atë në përdorues të tjerë. Site-i projektit është gati edhe për Shqipen. Klikoni mbi figurën për të shkuar te faqja e projektit.

Prej andej, duke u regjistruar do t’ju jepet mundësia të vendosni butona Përhapësi të Firefox-it – copëza kodi html që i vendosni në site-in tuaj web ose blogun tuaj për të nxitur vizitorët të shkarkojnë Firefox-in. Si ky këtu më poshtë:

Sa herë që një vizitor te site-i juaj klikon mbi një buton dhe shkarkon Firefox-in, ju përfitoni pikë prej atij shkarkimi. Përhapësit që grumbullojnë më shumë shkarkime prej site-eve të tyre do të paraqiten te tabela jonë e nderit dhe do të kenë mundësi të fitojnë gjëra të lezetshme, të tilla si bluza Firefox.

Etiketa: Firefox, Mozilla, Përhapës Firefox-i, projekt